کعبہ شریف

ابن سیرینؒ کے مطابق کعبہ شریف خلیفہ (حکمران) کی علامت ہے۔ کعبے کا طواف کرنا دین کی صلاح اور خلیفہ سے راحت پانے کی علامت ہے۔ احرام باندھ کر کعبے کی طرف رخ کرنا صلاحیت میں اضافے کی علامت ہے۔ کعبے کی زیارت کے لیے لوگوں کا آنا امانت کی حفاظت اور عزت و مرتبہ ملنے کی علامت ہے۔

امام جابر مغربیؒ کے مطابق بادشاہ کا کعبے میں جانا خلیفہ سے بزرگی ملنے کی علامت ہے۔ کعبہ خراب یا جلا ہوا دیکھنا خلیفہ کے برے حال کی علامت ہے۔ کعبے میں نماز پڑھنا خلفاء سے اچھے حالات کی علامت ہے۔

امام ابراہیم کرمانیؒ کے مطابق کعبہ خواب میں ایمان اور اسلام کی اصل ہے۔ اپنا کعبہ دیکھنا دشمن سے امن اور دعا کی قبولیت کی علامت ہے، جیسا کہ قرآن میں ہے: وَمَنْ دَخَلَہٗ کَانَ اٰمِنًا (جو اس میں داخل ہو، امن میں ہے)۔ حجرِ اسود کو بوسہ دینا حج کرنے کی علامت ہے۔ نبی کریم صلی اللہ علیہ وسلم کی زیارت یا مقامِ ابراہیم دیکھنا حج کرنے اور سلامتی سے واپسی کی علامت ہے۔

امام جعفر صادقؓ کے مطابق کعبے کی چار ممکنہ تعبیریں ہیں: خلیفہ، امام، ایمان و اسلام، یا ہر طرح کے خوف سے امن۔