کمان (Bow

حضرت دانیال علیہ السلام کے مطابق بغیر تیر کے کمان کھینچنا فائدہ مند سفر کی علامت ہے۔ کھینچتے وقت چلہ ٹوٹنا سفر کے ادھورا رہنے یا راستے میں نقصان کی علامت ہے۔ کسی کو کمان دینا اولاد یا بھائی کی علامت ہے۔ کمان ٹوٹنا شرف اور بزرگی کے کم ہونے کی علامت ہے۔ کمان سے تیر چلانا کسی بڑے آدمی کا خط ملنے کی علامت ہے۔

ابن سیرینؒ کے مطابق کمان سے تیر اندازی حق و باطل کے فرق کی علامت ہے۔ اپنے لیے کمان بنانا حکمران سے شرف ملنے یا بیٹے کی پیدائش کی علامت ہے۔ کمان بیچنا یا دینا شرف میں کمی کی علامت ہے۔

امام ابراہیم کرمانیؒ کے مطابق نئی پاکیزہ کمان شادی کی علامت ہے۔ تنی ہوئی کمان پائیدار بیوی کی علامت ہے۔ کمان ضائع ہونا بیوی سے جدائی کی علامت ہے۔ سخت کمان کا نرم ہو جانا کام کی آسانی کی علامت ہے۔ بہت سی کمانیں ہونا مصیبت کے وقت مدد کرنے والے دوستوں کی علامت ہے۔ پاکیزہ عمدہ کمان خیرات اور حج کرنے کی علامت ہے، جیسا کہ قرآن میں ہے: قَابَ قَوْسَیْنِ اَوْ اَدْنٰی (دو کمانوں کے فاصلے یا اس سے بھی قریب)۔

امام جعفر صادقؓ کے مطابق کمان کی چھ ممکنہ تعبیریں ہیں: سفر، اولاد یا بھائی، عورت، طاقت، نیک کام، یا کاموں میں درست آدمی۔